Vinnur femínistafélag Íslands gegn jafnrétti?

Það eru engin tíðindi að frjálslyndir femínistar (liberal feminists) telji rótæku femínistana (radical feminists) grafa undan málstað kvenna og eitra jafnréttisbaráttuna. Oftar en ekki skapa rótæku femínistarnir spennu og andstöðu milli karla og kvenna í stað þess að einbeita sér að því að vinna að breytingum á stjórnkerfinu til aukins jafnréttis.

Ofuráhersla á kynin skapar þessa spennu, enda stilla rótæku femínistarnir þessu oftar en ekki upp sem karlar gegn konum. Við frjálslyndu femínistarnir teljum að baráttan sé ekki við karlmenn, heldur er lausnin samvinna kynjanna.

Lagasetningar í anda rótækra femínista eins og jafnréttislögin skapa þessa spennu. Jákvæð mismunun er í eðli sínu neikvæð og ekki í anda jafnréttis. Nú sækja konur af auknum krafti í betri menntun og hærri embætti og með tíð og tíma mun jafnvægi nást í samfélaginu. Þó má ekki sofna á verðinum. Við verðum að gæta þess að jafnréttið sé ávallt í forgangi, en jafnrétti er ekki það sama og jafnt kynjahlutfall. Ég vil ekki sjá hæfar konur þurfa að víkja úr stöðum í framtíðinni vegna þess að þær eru konur og þá af sama skapi ætlast ég ekki til að karlar víki fyrir mér.

Jafnrétti er ekki einkamál okkar kvenna. Jafnrétti er mikilvægt fyrir alla þjóðfélagshópa, þá sérstaklega minnihlutahópa. Óhætt er að segja að við værum að gera lítið úr málstað samkynhneigðra, fólks af erlendum uppruna o.s.frv. ef við réttlætum það að okkur sé ýtt áfram af ,,jákvæðri mismunun" en þessum þjóðfélagshópum ekki. Ef 15% þjóðarinnar væru svartir ættu svartir þá kröfu á 15% af öllum stöðugildum í samfélaginu? Ég geri mér grein fyrir því að kynjabaráttan hefur þá sérstöðu að hún nær yfir allann hópinn, þar sem allir þjóðfélagshópar eru settir saman af konum og körlum. En barátta þessa hópa er sú sama og okkar kvenna, jafnrétti!

Femínistafélag Íslands hefur starfað að mínu mati algjörlega á þessari rótæku femínistahugmyndafræði og skapað sér neikvæða ímynd í þjóðfélaginu af þeirri ástæðu. Til dæmis mættu femínistar rísa upp og berjast fyrir bættu jafnrétti á fleirri sviðum. Félag einstæðra feðga er hópur sem fellur algjörlega undir þá þjóðfélagshópa þar sem jafnréttið er haft að engu.

Við stelpur eigum að hætta að líta á karla sem óvininn og fá þá í lið með okkur í jafnréttisbaráttunni. Þeir eiga nú flestir mæður, konur og dætur sem þeir vilja ekki að búi við óréttlæti.

Jafnrétti er ekki einkamál okkar stelpna.


Klám tengist ekki jafnrétti kynja

Fyrir þremur dögum velti femínistinn fyrir sér hvort eitthvað væri neikvætt við það þegar tvær manneskjur leika í klámmynd þegar vilji beggja aðila er fyrir hendi og einhver vill greiða fyrir afraksturinn? Nú ber blessaða klámið aftur á góma og í þetta skiptið er um heilt klámþing að ræða.

Femínistinn sér ekkert athugavert við klám eða heilt klámþing ef því er að skipta. Femínistar þeir sem aðhyllast róttækan femínisma hafa hins vegar spáð fyrir um heimsendi. Hvetja þær stjórnvöld til að stöðva klámþingið og fólk að sniðganga í framtíðinni Hótel Sögu þar sem þingið verður haldið. Vilja þær meina að tenging sé á milli kláms og kynferðislegs ofbeldis. Tala þær oft um rannsóknir sem benda til þess en aðspurðar vita þær hins vegar ekki hvar þessar rannsóknir er að finna.

Klám er frelsi einstaklinga yfir eigin líka. Femínistinn telur neikvæða umfjöllun um frelsið og tilraunir til að breiða yfir það klámvæðingarkápu ekki á neinn hátt tengjast jafnréttisumræðunni.

Morgunblaðið virðist bregða útaf hlutleysi í fréttaflutningi og tekur nú upp hanskan fyrir róttæklingum hér á mbl.is. Telur mbl.is ástæðu til að benda fólki á gagnrýni Sóleyjar Tómasdóttur um þingið.

Er ekki eðlilegt að mbl.is geri slíkt hið sama fyrir þessa færslu Femínistans?

Femínistinn ætlar að breyta til og opna fyrir athugasemdir. Óskað er eftir málefnalegum umræðum. Femínistinn áskilur sér rétt til að henda út ómálefnalegum athugasemdum.


mbl.is Klámþing verður haldið hér á landi í næsta mánuði
Tilkynna um óviðeigandi tengingu við frétt

Frelsi til að ,,klámvæðast"

Hvað er klámvæðing? Er klámvæðing af hinu illa? Á hún eitthvað skylt með jafnréttisbaráttunni? Femínistinn telur ástæðu til að svara þessum spurningum.

Þegar kona eða karl ákveður að ganga um í efnislitlum fatnaði af fúsum og frjálsum vilja er það neikvætt? Er eitthvað neikvætt við að konur og karlar skuli af fúsum og frjálsum vilja velja að leika í erótískum kvikmyndum? Er eitthvað neikvætt við fegurðarsamkeppnir? Er eitthvað neikvætt að konur og karlar leiki í auglýsingum á seiðandi hátt?

Femínistinn svarar þessu öllu neitandi. Allt eru þetta dæmi um frelsi hvers einstaklings til athafna og síðast en ekki síst frelsi einstaklings yfir eigin líkama. 

Femínistinn telur neikvæða umfjöllun um frelsið og tilraunir til að breiða yfir það klámvæðingarkápu ekki á neinn hátt tengjast jafnréttisumræðunni.

Pennar hafa verið önnum kafnir við prófalestur og hafa því lítið skrifað upp á síðkastið. Fljótt skipast þó veður í lofti og skorast Femínistinn ekki undan að svara kallinu og gagnrýna það sem betur má fara í jafnréttisbaráttunni!

F kveður að sinni.


Femínistinn ánægður með Geir

Femínistinn telur gagnrýni annarra femínista á formannskjör KSÍ vera vanhugsaða og ekki jafnréttisbaráttunni til framdráttar. Femínistinn áréttar fyrri skrif um að velja skuli til stjórnunarstarfa hæfasta einstaklinginn hverju sinni. Geir Þorsteinsson er óneitanlega sá einstaklingur enda sýndi það sig með þeim glæsilega stuðning sem hann fékk á nýafstöðnu þingi KSÍ.

Forðast skal að flokka einstaklinga eftir kyni. Einstaklingar eiga að vera metnir af eigin verðleikum. Þó svo kona hafi beðið lægri hlut í kjörinu skal eitt yfir alla ganga.

Halla Gunnarsdóttir vakti mikla athygli með framboði sínu og hvetur femínistinn hana til áframhaldandi starfa fyrir knattspyrnuna. Hún er ung og frambærileg kona sem á eflaust eftir að koma sterk inn í knattspyrnusambandið þó síðar verði.

Kötturinn í sekknum

4. feb kl. 12:47: Leiðréttist það hér með að ásakanir Katrínar um að hér væri á ferðinni andfemínískt vefrit voru byggðar á misskilningi.

 

Katrín Anna Guðmundsdóttir, talskona femínistafélagsins, skrifar um Vefritið Femínistann á bloggi sínu í dag:

Nú er sem sagt komið í ljós að síðueigendur skilgreina sig sem andfemínista. Reyndar segjast þeir aðhyllast stefnu iFeminisma - sem er ein tegund femínisma og þess vegna er and- forskeytið soldið skrýtið. Það sem mér finnst hins vegar alltaf soldið fyndið við ifeminsmann á sér sögu. Þegar Femínistafélagið var stofnað hélt þar ræðu fyrirmyndarfemínisti sem nefndi ýmsa drauma á nafn. Meðal þess sem hún sagði var að hana dreymdi um að ef að einhver nauðgaði konu þá færi hópur kvenna og stæði fyrir utan heimili nauðgarans og starði á hann.

Þetta er auðvitað brjálæðislega róttæk og stórhættuleg aðgerð - að dreyma um að horfa á nauðgara. Enda varð það fljótlega svo að ungir karlmenn sem af einhverjum ástæðum fannst það lýsa mikilli grimmd og óréttlæti í garð nauðgara að horfa á þá fóru í mikla herferð á netinu þar sem þeir úthúðuðu viðkomandi femínista og Femínistafélaginu. Í nafni frelsis var bannað að dreyma um að horfa á nauðgara. Það var of hræðilegt og í staðinn vildu þeir meina að þeir ættu til betri lausn. Lausnin var iFeminist. Þar sem ég er nógu forvitin ákvað ég að tékka á síðunni - og hver var lausnin? Jú, konur áttu einfaldlega að ganga með byssur og ef einhver gerði tilraun til að nauðga þeim átti einfaldlega að skjóta hann.

george_crackle_sackÍ skrifum sínum reynir Katrín augljóslega að kasta rýrð á Vefritið Femínistann. Ljóst er að Katrín er annað hvort ekki sammála þeirri aðferð sem Femínistinn vill fara til að ná fram jafnrétti eða einfaldlega öfundsjúk yfir því að hér skrifi hópur utan Femínistafélags Íslands.

Hún gengur raunar svo langt að kenna Vefrit þetta við andfemínisma. Síðuskrifarar árétta að þeim þyki jafnrétti ekki hafa verið náð hér á landi og vilja leggja sitt af mörkum í jafnréttisbaráttunni.

Í skrifum sínum reynir hún einnig að tengja upphaf einstaklingsfemínisma við mótmæli gegn samansafnaði kvenna fyrir utan hús nauðgara og að lausnin við nauðgunum sé að konur gangi með byssur á sér. Þetta er ekki á neinn hátt skylt einstaklingsfemínisma sem höfundar Vefritsins Femínistans aðhyllast. Það sjá allir sem lesa þessa síðu. Höfundar láta því skrif Katrínar sem vind um eyru þjóta og vonast höfundar eftir hlýlegri viðbrögðum frá talskonu femínistafélagsins í náinni framtíð. Höfundar telja sig eiga margt sameiginlegt með Katrínu og vonum við að þarna hafi hún einungis farið ögn fram úr sér.

Þeir sem lesa Vefritið Femínistann eru svo sannarlega ekki að kaupa köttinn í sekknum. Hér eru á ferðinni alvöru jafnréttissinnar!

Femínistinn bendir fólki að lokum á skrif Kristínar Tómasdóttur sem virðist vera fullmeðvituð um hin ýmsu afbrigði femínismans og að öll stefnuafbrigði boði ekki sömu leiðir.

Hafið það gott um helgina!
Ritstjórn Femínistans


Femínistinn boðar nýjar áherslur

Eins og sagði í leiðara femínistans 31. janúar verður tilgangurinn með þessu vefriti að varpa nýju ljósi á jafnréttisumræðuna. Femínistinn boðar stefnu einstaklingsfemínismans og telur ritstjórn sig tala þar máli fjölda jafnréttissinna, kvenna sem karla.

Einstaklingsfemínismi er sú stefna sem boðar jafnan rétt kvenna og karla gagnvart lögum. Sumir kunna að spyrja sig hvers vegna Femínistinn kalli sig ekki Einstaklinginn þar sem áherslurnar snúa að hlutleysi gagnvart einstaklingnum. Spurningunni er auðsvarað því kynjajafnrétti er aðeins hluti af  baráttu fyrir hlutleysi gagnvart einstaklingnum og jafnréttisbaráttunni í heild sinni en Femínistinn leggur sérstaka áherslu á jafnrétti kynjanna.

Ritstjórn Femínistans telur að grundvöllur sé fyrir einstaklingsfemínisma hér á landi og mun vefritið kappkosta að greina frá og skapa umræður um þetta afbrigði femínismans.


Femínistinn telur að

gender... einstaklingur eigi að vera metinn út frá eigin verðleikum. Ekki á að mismuna fólki eftir kyni, kynþætti, litarhætti, þjóðerni eða trúarbrögðum.

... það sé stjórnendum fyrirtækja fyrir bestu að velja hæfasta einstaklinginn til starfa hverju sinni án þess að líta til kyns. Þannig hagnast stjórnandinn mest. Það er því eðlilegt að í afmörkuðum hópum sé kynjahlutfall ekki jafnt.

... þegar bera eigi saman hlutdeild kynjanna verði að líta á alla heildina en ekki litla afmarkaða hópa, s.s. einn vinnustað eða eina stjórn.

... hugmyndir um kynjakvóta eða lagasetningar frá ríkisvaldinu er varða hlutfall kynjanna á vinnustöðum vera á villigötum.

... kynin eigi að hafa fullkomið frelsi yfir eigin líkama. Femínistinn telur gagnrýni á klæðaburð og útlit kynjanna í jafnréttistilgangi vera afleidda og á engan hátt vera tengda jafnréttisbaráttunni.

 

Breyting 19:32: ekki var um efnislega breytingu að ræða. Einungis var bætt við mynd og innsláttarvilla lagfærð.


Spurt er

woman145x260í skoðanakönnun þessarar viku um hvort þú, lesandi góður, hafir sótt um launa- eða stöðuhækkun á síðastliðnu ári. Vinsamlegast svarið könnuninni sem birtist hér í vinstri dálki síðunnar.

Vefritið femínistinn

female_maleÍ dag hefur nýtt vefrit göngu sína, Femínistinn.

Höfundar vefritsins eru margir og eru engar skorður settar á skrif þeirra og efnistök, allir eiga þeir þó það sameiginlegt að vera femínistar og styðja jafnan rétt kvenna og karla. Mun Femínistinn leitast við að vera gagnrýninn í umfjöllun sinni og varpa nýju ljósi á jafnréttisumræðuna. Femínistinn sem slíkur er ekki tengdur stjórnmálasamtökum en höfundar koma úr ýmsum stjórnmálaflokkum og eru sumir hverjir virkir í pólitísku starfi. Að öðru leiti verður stefnu ritstjórnar gerð skil í komandi skrifum.

Að þessu sögðu vill ritstjórn Femínistans bjóða lesendur velkomna á þetta nýja vefrit.


Innskráning

Ath. Vinsamlegast kveikið á Javascript til að hefja innskráningu.

Hafðu samband